Lapau Malin dilaunching

Oleh : Ilham Mustafa,

Lah satahun malin manganggur, sajaknyo tamaik kuliah di pulau Jawa. Kini baru takana deknyo kabarusaho. Alah lamo tamanuang-tamanuang malin, maliek nasibnyo nan alun juo barubah, takana pulo deknyo ka punyo lapau. Nyo bangunlah lapau dek malin ko di dakek kampus. Kabatulan ado Tanah urang gaeknyo di dakek kampus. Ndak bara hari alah tagak lapau baatok rumbia, bapalanta kayu. Mancaliak lapau lah tagak modetu, takana lo lah dek malin pai ka tampek Pak Joronguntuak bakonsultasi, baa rancaknyo lapau nan ko. Soretu, Pai lah malin, ka rumah Pak Jorong.

"Oi Pak Jorong" kicek Malin.

"ba oi oi c ma, pakai salam lah stek malin" kicek Pak Jorong.

"Alah alim bana Pak Jorong kini mah"

"badanko ka di pakai lamo mah malin, baru iduik di rantau ampek tahun, alah barubah lo tradisi awak dek malin, kadang kalau mangicek jo malin, ndak katakah diaja lai do, awak alah sarjana, tapi baa lai, nan nagari wak ko yo mode tu, baadat basandi syarak, syarak basandi kitabullah, kok nan salah samo-samo mangiekan"

"ayo lah, kalu modetu kicek Pak Jorong, Assalamualaikum"

"Waalaikumsalam warahmatullahi wabarokatuh, ha yo modetu malin, kiro-kiro apo carito malin, mangko sampai lo tibo di rumah, kok ado nan paralu, insyaallah ambo bantu"

"Modeko mah Pak Jorong, Lapau nan baru ambo bangun tu lai tau Pak Jorong kan?"

"lai malin"

"Nan rencana ambo ma Pak Jorong, supayo nak dikenal urang lapau tu dibuek acara launching lapau, bia nak mecing lo lapau tu stek. Ambo maambiak contoh ka nan sudah-sudah, kalau ado kadai baru di ibu kota, dilaunching lo dulu, kalau ado gedung baru ado lo peresmiannyo, modetu jo presiden dilantik juo dulu, sabalun karajo, baa dek Pak Jorong? bia nak terkenal lo lapau ambo ko"

"kok dek ambo, nan biaso-biaso c lah malin. Ndak paralu lo mambuek acara modetu do. Kok lamak galeh malin urang kabaliak juonyo. Kok ado acara syukuran saketek-ketek ndak baa juo do"

"ha nyo mode ko mah Pak Jorong, rencana ambo ka maundang pejabat pemerintah lo, ka mangguntiang pita untuak maresmikan lapau ambo ko. Sudah tu ado lo acara pemuda saketek. Kalau bisa wak undang pak Rektor jo mahasiswa dakek kampu sakali bia nak menyatu jo masyarakat. Kok pagi wak buek acara sambutan dari gubernur sekaligus peresmian. siap tu acara malam main kim jo pemuda dan mahasiswa sekitar kampus ko, baa menurut Pak Jorong?"

"malin-malin, nan biaso-biaso se lah dikarajoan. Jangga caliak urang beko. Ndak lo ado urang nan mambuek takah itu di kampuang wak ko do. bakalabiahan namonyo mah malin. Kalau bahaso agamonyo mubazir. Nan ambo iyo ndak sasuai jo rencana malin nan ko do. Apo lai ka maundang pejabat, ntah lai ka tibo ka indak. Ka main kim lo malam, kok iyo lai badendang jo balagu sajo, kok baundang lo artis seksi tu lah kacau lo beko. Mambuek karuah suasana malin namonyo tu"

"Itu nan taraso dek ambo mah Pak Jorong, kok ka modetu caro pikia Pak Jorong taruih bilo kamaju kampuang kito ko. Bia nan ado perbuhan saketek. Takah mahasiswa banyak ko disabuik agent of change, antah a nan diubanyo, tatap jo disabuik saruman tun. jadi dek ambo mah Pak Jorong, yo paralu lo ado acara-acara modetu di kampuang kito ko. Dek kini kampuang lah mulai ndak ado hiburan nampak dek ambo, lah ampia satahun wisuda, ambo caliak alun ado perubahan nampak dek ambo. Ka ditunggu pemerintah, antah ka bilo. Iko sambia manyelam minum aia mah Pak Jorong. Nan lapau di Launching juo, nan masyarakat terhibur pulo. Pas acara kampuang kito meriah lo jo ucapan selamat pakai karangan bunga dan spanduk yang isinyo : selamat atas di launchingnya lapau malin. kan rancak modetu mah Pak Jorong" Sambia Disalekan pitih ka saku Pak Jorong.

"Tarasah malin lah, kok ambo yo kurang mangarati jo acara modetunyo. Apo nan bisa ambo bantu?"

"Pak Jorong bantu maagiah izin lah jadi tu mah. Siap tu manyiapkan tanago pemuda-pemuda. Kalau untuak dana aman Pak Jorong"

"A,, jadi lah malin, rencana malin bilo ka dilauncing lapau tu?"

"Minggu muko Pak Jorong, lai aman kan?"

"oke"

Dimuat di Tabloid Suara Kampus Edisi 116